Spillbericht Senior 1 Championnat Donnëschdeg, 27.03.2008 20.00h : Aspelt - Tricolore 0:2 (0:1)

Wieder : Reen, kal

Terrain : trotz Reen, bespillbar

Zuschauer : 20

0:1 8' Antonicelli

0:2 90' (+4') Chioato (Penalty)

E Minimum huet Tricolore zu Uespelt bruecht.

Tricolore huet gutt ugefaang, an der 8' ass de Mino Tria op lénks duerchgaang, an de Strofraum gezunn, an huet an d'Mëtt gepasst, wou

de Carlo Antonicelli um 5m locker zum 0:1 eragesat huet. Dueno war spillërech op bäide Säite Magerkost ugesot. Uespelt war nach virum

Goal 2X geféierlech, ee mol wéi e Spiller fräi zum Kappball komm ass, an eng aner Kéier huet en Uespelter Spiller mat engem Fräistouss

de Steve Krier am Goal getest. Tricolore huet de Mätch kontrolléiert, ouni awer wirklech geféierlech ze sinn.

No der Paus huet de Reen opgehal, mee leider ass dobäi och d'Qualitéit nach weider erofgaang. Chancen ware praktesch keng méi ze 

verzeechne gewiescht, a sou war villes nëmmen Zoufall.  An der Nospillzäit koum Tricolore nach zu engem Penalty, deen de Emanuele Chioato

locker verwandelt huet.

Net vill Goalchancen, ee "Geniesträich" an der 8' ass douergaang, fir Tricolore op d'Gëwennerspur ze bréngen.